Əfqanıstan İslam Əmirliyinin Xarici İşlər nazirinin köməkçisi və Talibanın mühüm fiqurlarından olan Şir Muhəmməd Abbas Stanekzayi Pakistanı narahat edəcək açıqlamalar verib.

"Reels.az" xəbər verir ki, siyasətçi SSRİ-nin Əfqanıstanı tərk etməsi münasibətilə Loqar vilayətində təşkil olunan tədbirdə çıxışı zamanı Pakistanla sərhədi müəyyənləşdirən Durand xəttini sərhəd kimi tanımayacaqlarını bildirib. 
Stanekzayi şərq qonşularının ərazisində puştunların çoxluqda yaşadığı ərazilərə iddiasını dilə gətirib. Bu məntəqələri nəzərdə tutan Taliban rəsmisi Pakistanın ölkədəki etnik puştunlardan Əfqanıstana getmək üçün viza tələb etməsini "qəbuledilməz" adlandırıb. 

"Durand xəttini tanımırıq. Bu gün Əfqanıstanın yarısı həmin xəttin digər tərəfində qalıb. Durand ingilislərin əfqanların qəlbinə cızdığı bir yaradır. Qonşumuz olan ölkə (Pakistan) əfqanları amansız şəkildə qovur və ölkələrnə qayıtmağı tələb edir" - Stanekzayi deyib. 
Pakistanın Xarici İşlər Nazirliyi bu açıqlamalara münasibət bildirərək onların tarixi, coğrafi və beynəlxalq hüququ dəyişdirməyəcəyini qeyd edib. 
Xatırladaq ki, Durand xətti 1893-cü ildə müəyyənləşdirilib. Bu sərhəd Talibandan öncəki Əfqanıstan hökumətləri tərəfindən də tanınmamışdı.